काठमाडौँ / प्रधानमन्त्री केपी शर्मा ओलीसँग भेटवार्ता भएपछि निर्माण व्यवसायी महासङ्घले तत्काल आन्दोलन नगर्ने भएको छ । निर्माण व्यवसायी महासंघको टोलीले बुधबार प्रधानमन्त्री ओलीसँग भेट गरेको थियो ।
प्रधानमन्त्रीसँगको भेट सकारात्मक भएको भन्दै महासंघले शुक्रबारदेखि राजधानीमा गर्ने भनेको धर्नासहित कार्यक्रम फिर्ता लिने निर्णय गरेको हो ।
उक्त भेटवार्तापछि प्रधानमन्त्री ओलीले समस्या समाधानका लागि कार्यदल गठन गर्न सरोकारवालालाई निर्देशन दिएका थिए ।
यसअघि महासंघले २७ पुसमा राष्ट्रिय भेला आयोजना गरी चरणबद्ध आन्दोलन घोषणा गरेको थियो । महासंघले भुक्तानी, मूल्यवृद्धि तथा विभिन्न सार्वजनिक खरिद कानुनमा रहेका अवरोध हटाउन माग गर्दै आएको छ ।
यसबीच निर्माण व्यवसायीले विभिन्न दलका नेता र विभागीय मन्त्रीहरूलाई भेटेर ज्ञापन पत्र बुझाएका थिए । निर्माण व्यवसायीहरूले १४ बुँदे माग पूरा गर्न १५ दिनको अल्टिमेटम दिएर १८ माघदेखि सडक आन्दोलन घोषणा गरेका थिए ।
