काठमाडौँ / आज शेयर बजारमा भारी अङ्कले बृद्धि भएर २ हजार ५ सयको विन्दु क्रस गरेको छ । 

नेपाल स्टक एक्सचेन्ज (नेप्से) परिसूचक झन्डै २९ महिनापछि २५ सय अङ्कको बिन्दुमाथि पुगेको छ । विगत लामो समयसम्म ‘बियरिस ट्रेन्ड’मा रहेको नेप्से परिसूचकले आज २५ सय अङ्कको बिन्दु पार गरेको हो ।

यसअघि २०७८ चैत अन्तिममा २५ सय अङ्कको बिन्दुमाथि थियो । त्यसपछि निरन्तर घट्दै परिसूचक १८१९ अङ्कसम्म झरेको थियो । 

तर लामो समयसम्म ‘बियरिस ट्रेन्ड’मा बसेपछि आज परिसूचक ७५.३३ अङ्कले बढेर २ हजार ५ सय ६३ को विन्दुमा कायम भएको छ । 

दुई ठुला राजनीतिक दल नेपाली कांग्रेस र नेकपा एमालेको सत्ता साझेदारीसँगै नेप्से परिसूचक उकालो लाग्न थालेको थियो । 

सरकार बनाउने सम्झौता भएको दिन असार १७ गतेसम्म परिसूचक २०३७ अङ्कमा थियो । असार १७ गते राती सम्झौता हुनुभन्दा अगावै बजारमा दुई राजनीतिक दलले सरकार गठन गर्ने हल्ला चलेपछि बजार बढ्न थालको थियो ।

त्यसयता नेप्से परिसूचक झन्डै ५०० अङ्कले बढिसकेको छ । यस क्रममा नेप्सेमा कारोबार रकम समेत बढ्न थालेको छ । यसअघि दैनिक औसतमा ३ अर्ब रुपैयाँ हाराहारीको कारोबार हुने नेप्सेमा यति बेला १० अर्बमाथिको कारोबार हुन थालिरहेको छ ।

आज २२० कम्पनीको शेयर मूल्य बढेको छ भने २० कम्पनीको मात्रै शेयर मूल्य घटेको छ । आज दिनभरिमा ३१७ कम्पनीको ३ करोड ९७ लाख ९० हजार ८८९ कित्ता शेयर किनबेच हुँदा १४ अर्ब ११ करोड ६३ लाख रुपैयाँको शेयर कारोबार भएको छ । 

शिवम सिमेन्टको सबैभन्दा धेरै शेयर कारोबार

आज सबैभन्दा धेरै शिवम सिमेन्टको शेयर कारोबार भएको छ । आज यस कम्पनीको २४ करोड ४६ लाख रुपैयाँको शेयर कारोबार भएको छ । 

अपि पावरको २४ करोड २६ लाख रुपैयाँको शेयर कारोबार भएको छ । हिमालयन रिइन्स्योरेन्सको २३ करोड २ लाख रुपैयाँको शेयर कारोबार भएको छ ।

यी कम्पनीको लगानीकर्ताले कमाए सार्वधीक 

आज सबैभन्दा धेरै पाँच कम्पनीका लगानीकर्ताले कमाएका छन्। आज बोटलर्स नेपाल बालाजू, समृद्धि फाइनान्स, माण्डु हाइड्रो, हाथवे इन्भेष्टमेन्ट, नेपाल वेयरहाउजिङका लगानीकर्ताले १० प्रतिशतका दरले कमाएका छन् । आज ११ कम्पनीको शेयर मूल्यमा सकारात्मक सर्मिट लागेको छ ।

यी कम्पनीको लगानीकर्ताले गुमाए सार्वधीक 

आज सबैभन्दा धेरै गणपति लघुवित्त वित्तीय संस्थाका लगानीकर्ताले गुमाएका छन् । आज यस कम्पनीका लगानीकर्ताले ५ दशलमव ८३ प्रतिशतका दरले गुमाएका हुन् ।