काठमाडौँ / भोटेकोशी नदीमा ‘२२ औँ हिमालयन ह्वाइटवाटर च्यालेन्ज’ आजदेखि सुरु हुने भएको छ ।
नेपाल एसोसिएसन अफ राफ्टिङ्ग एजेन्सिज (नारा)ले नेपाल पर्यटन बोर्ड र संस्कृतिक पर्यटन तथा सहकारी मन्त्रालको सहकार्यमा असार १० र ११ गते सिन्धुपाल्चोक जिल्लाको भोटेकोशी नदीमा राष्ट्रिय स्तरको ‘२२ औँ हिमालयन ह्वाइटवाटर च्यालेन्ज’ कार्यक्रम हुने भएको हो ।
नाराका अध्यक्ष शिव अधिकारीका अनुसार नेपालको जलयात्रा व्यवसायलाई अन्तर्राष्ट्रिय स्तरमा प्रवर्द्धन गर्ने उद्देश्यले राष्ट्रिय स्तरको प्रतिष्पर्धात्मक जलयात्रा आयोजना गर्न लागिएको हो ।
उक्त प्रतियोगितामा राफ्टिङ्ग र कायकिङ्ग गरी दुई वटा खेलका अनुभवीहरू सहभागी हुन पाउने उनले बताए ।
नेपालका १ सय जना र विदेशी २० जना गरी राफ्टिङ्ग र कायकिङ्ग खेलाडीले सो प्रतिस्पर्धामा सहभागी हुनसक्ने आयोजकको आँकलन छ ।
प्रतियोगितामा राफ्टिङ्गतर्फ विजयी हुने प्रथम खेलाडीले ५० हजार रुपैयाँ, दोस्रोले ४० हजार रुपैयाँ र तेस्रो खेलाडीलाई ३० हजार रुपैयाँ मेडल र प्रमाण पत्र प्रदान गरिने उनले जानकारी दिए।
त्यस्तै, कायकिङ्ग खेलतर्फ प्रथम खेलाडीले २० हजार , दोस्रोले १५ हजार र तेस्रो खेलाडीले १५ हजार साथै मेडल र प्रमाणपत्र पाउने छन् ।
.gif)
