काठमाडौं/ नेपाल बिमा प्राधिकरणका अध्यक्ष मदन दाहालले एक कार्यक्रमलाई सम्बोधन गर्दै सम्पत्ति शुद्धीकरण निवारण गर्ने राष्ट्रिय दायित्व बिमा क्षेत्रको पनि भएको बताएका छन् ।
हाम्रै दायित्व भएकाले सोही अनुसार जिम्मेवारीपूर्वक काम गर्न बिमा कम्पनीका कार्यान्वयन अधिकारीहरूलाई निर्देशन दिए ।
नेपाल बिमा प्राधिकरणको आयोजनामा हिजो प्राधिकरणको केन्द्रीय कार्यालयमा सम्पत्ति शुद्धीकरण निवारण सम्बन्धी अभिमुखीकरण कार्यक्रम सम्पन्न भएको छ ।
‘वित्तीय क्रियाकलापमा पारदर्शिता, सम्पत्ति शुद्धीकरण निवारणमा प्रतिवद्धता’ भन्ने नाराका साथ मनाउन लागिएको ‘सम्पत्ति शुद्धीकरण निवारण राष्ट्रिय दिवस’ को पूर्वसन्ध्यामा कार्यक्रम आयोजना गरिएको जनाएको छ ।
बिमा क्षेत्रमा हुनसक्ने सम्पत्ति शुद्धीकरण निवारणका लागि नेपाल बिमा प्राधिकरणमा छुट्टै शाखा स्थापना गरिएको र बिमा कम्पनीहरूलाईसमेत यस सम्बन्धी कार्य गर्ने गरी छुट्टै शाखा स्थापना गर्न निर्देशन दिइएको उनले बताए ।
अध्यक्ष दहालले बिमा कम्पनीहरूलाई सम्पत्ति शुद्धीकरण निवारण सम्बन्धी तालिम लगायत आवश्यक प्राविधिक सहयोग गर्न प्राधिकरण तयार रहेको बताए ।
कार्यक्रममा डा. हरि कुमार नेपालले सम्पत्ति शुद्धीकरण निवारण सम्बन्धी समग्र विषयमा प्रस्तुत गरेका थिए ।
कार्यक्रममा नेपाल बिमा प्राधिकरणका निर्देशक कमल प्रसाद रेग्मी तथा उपनिर्देशक पदम प्रसाद सोडारी र जीवन बीमा कम्पनी, निर्जीवन बीमा कम्पनी, लघुबीमा कम्पनी तथा पुनर्बीमा कम्पनीका कार्यान्वयन अधिकारीहरूको सहभागिता थियो ।
