चीनले बिहीबार कोरियाली प्रायद्वीपको स्थितिप्रति ‘चिन्ता’ व्यक्त गरेको छ । प्योङयाङले आफ्नो आणविक निवारण बलियो बनाउन सबैभन्दा शक्तिशाली क्षेप्यास्त्रमध्ये एकको परीक्षण गरेको बताएपछि चीनले चिन्ता व्यक्त गरेको हो ।
रुसमा सैनिक पठाएको आरोप लागेपछि उत्तर कोरियाको यो पहिलो हतियार परीक्षण थियो ।
“अहिलेसम्मको प्रारम्भिक मूल्याङ्कनअनुसार प्योङयाङले नयाँ ठोस चालित लामो दूरीको ब्यालिस्टिक क्षेप्यास्त्रको परीक्षण गरेको हुनसक्छ”, दक्षिण कोरियाली सेनाले भनेको छ ।
बेइजिङको विदेश मन्त्रालयले बिहीबार कोरियाली प्रायद्वीपमा भएका घटनाक्रमप्रति चिन्तित रहेको बताएको छ ।
“चीनले प्रायद्वीपमा शान्ति र स्थिरता कायम राख्ने र प्रायद्वीप मुद्दाको राजनीतिक समाधानको प्रक्रियालाई बढावा दिने कुरा सबै पक्षको साझा हितमा रहेको लगातार मान्दै आएको छ”, मन्त्रालयका प्रवक्ता लिन जियनले बेइजिङमा आयोजित नियमित पत्रकार सम्मेलनमा भन्नुभयो, “सबै पक्षले यस लक्ष्यतर्फ प्रयास गर्नेछन् भन्ने हामी आशा गर्दछौँ”।
यो प्रक्षेपण अमेरिकी र दक्षिण कोरियाली रक्षा प्रमुखहरूले प्योङयाङलाई रुसबाट आफ्ना सैनिकहरू फिर्ता बोलाउन आह्वान गरेको केही घण्टापछि भएको हो । उनीहरूले रुसी वर्दीमा रहेका उत्तर कोरियाली सैनिकहरू युक्रेनविरुद्ध सम्भावित कारबाहीका लागि तैनाथ गरिएको चेतावनी दिएका थिए ।
चीन उत्तर कोरियाको लामो समयदेखिको मित्रराष्ट्र हो । उत्तर कोरिया कूटनीतिक र आर्थिक समर्थनका लागि बेइजिङमा धेरै निर्भर छ । बेइजिङ र सोल पनि प्रमुख व्यापारिक साझेदारहरू हुन् ।
.gif)
