काठमाडौँ / नेकपा एमाले सांसद योगेश भट्टराईले विशेष समयमा बोल्ने क्रममा ‘हिंसा’ शब्द प्रयोग गरेपछि सदनमा हँगामा भएको छ ।
बुधबार बसेको प्रतिनिधि सभा बैठकमा भट्टराईले माओवादी अध्यक्ष प्रचण्डले मङ्गलबार दिएको अभिव्यक्तिप्रति काउन्टर जवाफ दिएका थिए । सो क्रममा ‘हिंसा’ शब्द प्रयोग गरेपछि नेकपा माओवादीले नियमापत्ति जनाएको हो ।
भट्टराई बोल्दाबोल्दै माओवादी सांसद माधव सापकोटाले नियमापत्ति जनाएका थिए । त्यसपछि भट्टराईले ‘हिंसै हो, हिंसा हो, हिंसा हो’ भन्ने अभिव्यक्ति दिएका थिए ।
सापकोटाले मान्दैनौँ भनेपछि भट्टराईले “हाम्रो परिभाषा हो उहाँले नमाने पनि केही फरक पर्दैन” भन्ने अभिव्यक्ति दिए । सापकोटाले संविधानले कहाँ हिंसा भन्छ भन्दै प्रश्न गरेपछि माओवादीका अन्य सांसदहरूले समेत उठेर आपत्ति जनाएका थिए ।
त्यसपछि पुनः भट्टराईले “अर्कालाई बोल्न नदिनु पनि हिंसा हो । तपाईँको धम्कीले कोही डराउँदैन । धम्कीले कोही डराउँदैन, हिंसा हो,” भनेका थिए ।
त्यसपश्चात् माओवादी सांसद देवेन्द्र पौडेलले शान्ति प्रक्रियालाई लत्याउने संविधान विरोध काम भएको भन्दै शब्द रेकर्डबाट हटाउन माग गरे ।
त्यसपछि सभामुखले संसद्को मर्यादालाई ख्याल गर्नु भन्दै आशनग्रहण गर्न निर्देशन दिएका थिए ।
पुनः भट्टराईले बोल्न सुरु गरेपछि नेकपा माओवादीका सचेतक हितराज पाण्डेले समय माग गरेका थिए ।
सभामुखले उनलाई समय दिन अस्वीकार भएपछि सापकोटाले प्रतिवाद गरेका थिएन । त्यसपछि भट्टराईले आफूले गलत कुरा नगरेको जिकिर गरेका थिए ।
सो पश्चात भट्टराईलाई सभामुखले बस्न निर्देशन दिँदै सचेतक पाण्डेलाई बोल्न समय दिएका थिए ।
.gif)
