काठमाडौँ / नाडा अटोमोवाइल्स एसोसिएसन अफ नेपालका अध्यक्ष करण चौधरीले अटो मोवाइल्स व्यवसायीहरूले १० बर्षे स्थिर नीति चाहेको बताएका छन् । काठमाडौँको भृकुटी मण्डमा आजदेखि सुरु भएको नाडा अटो शोको उद्घाटनका क्रममा उनले यस्तो बताएका हुन् ।
सानो ट्रेडिङबाट अटो व्यवसायीहरू उद्योगीतिर बिकास भएको बताउँदै उनले सरकारले पोलिसीमा फोकस गर्नुपर्ने उल्लेख गरेका छन् ।
उनले भने, “अटोमोवाइस्ल व्यवसायीहरूलाई केही चाहिँदैन नीतिगत स्थ्रिता हुनुपर्यो ।” सरकारकै नीतिका कारण व्यवसायीहरू ठूलो मारमा परिरहेको र अब के होला भन्ने त्राससमेत रहेको उनको भनाइ छ ।
अटो क्षेत्रलाई प्राथमिकता दिन उनको माग छ । “अटो क्षेत्र एकादेशको कथा नहोस् । पाँच हजार व्यवसायीहरू घटेर तीन हजार पुगेका छन् ।”
अटो बिलासितामा मात्रै सीमित नरही अहिलेको प्रमुख आवश्यकता बनेको उनले बताए । मौद्रिक नीतिले अटो क्षेत्र समेटन् नसकेको गुनासो गर्दै उनले भने, “१० बर्षे परियोजना चाहियो। हामीलाई नेपालमा बस्नु छ। काम गर्नु छ ।”
व्यवसायीहरू अटो क्षेत्र लगानी गर्न तत्पर रहेको र चार्जिङ स्टेसन थपिरहेका उनले बताए ।
सरकारले प्रदुषण कम गर्न प्राथमिकता दिनुपर्ने उनको भनाइ छ । नाडा अटोमोवाइल्स एसोसिएसन अफ नेपालको आयोजनामा अटो मोबाइल्स क्षेत्रको कुम्भ मेला मानिने ‘नाडा अटो शो’ आजबाट सुरु भएको हो ।
काठमाडौँको भृकुटी मण्डमा हुने नाडा अटो शो २०२४ भदौ ११ गतेसम्म चल्नेछ ।
.gif)
