काठमाडौँ / चालु आर्थिक बर्ष २०८०/८१ को ११ महिनामा वाणिज्य बैंकहरुले साढे ५६ अर्ब नाफा आर्जन गरेका छन् ।
नेपाल राष्ट्र बैंकले सार्वजनिक गरेको तथ्याङ्क अनुसार हाल सञ्चालनमा रहेका २० वटा वाणिज्य बैंकहरूको साउनदेखि जेठ मसान्तसम्ममा ५६ अर्ब ४५ करोड रुपैयाँ नाफा आर्जन गरेका हुन् ।
सार्वधिक नाफा कमाउनेमा नबिल, पछ्याउदै ग्लोबल आइएमई
११ महिनाको अवधीमा सबैभन्दा धेरै नाफा नबिल बैंकले आर्जन गरेको देखिएको छ । यस बैंकले जेठ मसान्तसम्ममा ६ अर्ब ३३ करोड रुपैयाँ खुद नाफा आर्जन गरेको छ ।
यस्तै, नबिल पछि सबैभन्दा धेरै नाफा आर्जन गर्ने दोस्रो स्थानमा ग्लोबल आइएमई बैंक रहेको छ । यस बैंकले ५ अर्ब ९ करोड आर्जन गरेको छ ।
अन्य कुन बैंकको नाफा कति ?
यस्तै, जेठ मसान्तसम्ममा नेपाल इन्भेष्टमेण्ट मेगा बैंकले ४ अर्ब ३८ करोड रुपैयाँ नाफा आर्जन गरेको छ । यस्तै, प्राइम कमर्सियलले ३ अर्ब ५५ करोड रुपैयाँ नाफा आर्जन गर्दा एभरेष्ट बैंकले ३ अर्ब ३१ करोड रुपैयाँ खुद नाफा आर्जन गरेको छ ।
यता, जेठ मसान्तसम्म सरकारी स्वामित्वको राष्ट्रिय वाणिज्य बैंक नाफाका आधारमा छैटौं स्थानमा छ । यो बैंकले ३ अर्ब ६ करोड रुपैयाँ नाफा कमाएको छ ।
त्यसैगरी, प्रभु बैंकले ३ अर्ब ३ करोड, कृषि विकास बैंकले ३ अर्ब २ करोड र स्ट्याण्डर्ड चार्टर्ड बैंकले ३ अर्ब १ करोड ९० लाख रुपैयाँ नाफा कमाएका छन् । समग्रमा ९ वाणिज्य बैंकले ३ अर्बभन्दा बढी नाफा आर्जन गरेका छन् ।
दुई अर्ब रुपैयाँभन्दा बढी र तीन अर्बभन्दा कम नाफा कमाउने ५ वटा वाणिज्य बैंक छन् । यस अवधिमा एनएमबि बैंकले २ अर्ब ७७ करोड खुद नाफा कमाउँदा हिमालयन बैंकले २ अर्ब ७६ करोड, लक्ष्मी सनराइजले २ अर्ब ३७ करोड, सिद्धार्थ बैंकले २ अर्ब २७ करोड र एनआईसी एशिया बैंकले २ अर्ब २३ करोड रुपैयाँ खुद नाफा आर्जन गरेका छन् ।
साउनदेखि जेठ मसान्तसम्ममा ६ वाणिज्य बैंकको दुई अर्बभन्दा कम नाफा छ । सिटिजन बैंकले १ अर्ब ७५ करोड नाफा कमाउँदा सानिमाले १ अर्ब ७४ करोड कमाएको छ ।
यस्तै कुमारी बैंकको १ अर्ब ६७ करोड, नेपाल एसबिआई बैंकको १ अर्ब ६६ करोड, माछापुच्छे बैंकको १ अर्ब २८ करोड रुपैयाँ नाफा देखिन्छ । नेपाल बैंकले सबैभन्दा कम १ अर्ब ७ करोड नाफा आर्जन गरेको छ ।
.gif)
