काठमाडौँ / बुक बिल्डिङ विधिबाट महँगो मूल्यमा साधारण सेयर (आइपिओ) जारी गर्न लागेको रिलायन्स स्पिनिङ मिल्सको आइपिओ निष्काशन विवाद लेखा समितिमा पुगेको छ । मङ्गलबार बसेको समितिको बैठकले आइपिओ निष्कासनका विषयमा प्रश्न उठेपछि नेपाल धितोपत्र बोर्ड (सेवोन)लाई एक साताभित्र विस्तृत विवरण पठाउन निर्देशनसहितको पत्र पठाएको छ ।

कम्पनीको प्रक्षेपित विवरण र वास्तविकतामा सामन्जस्यता नदेखिएको भन्दै असार २७ गतेदेखि निष्काशन गर्न लागेको आइपिओबारे कडा आलोचना भएपछि समितिले यस विषयमा छलफल गरेको हो । समितिका सभापति ऋषिकेश पोखरेलले सेवोनको जवाफ र प्रतिक्रिया हेरेर थप लिने जानकारी दिए । 

“कम्पनीको आधार मूल्य के आधारमा तय गरिएको हो ? बुक विल्डिङमा आउने कम्पनीको आधार मूल्य तय गर्ने अधिकार कसलाई छ र यसको प्रकिया के हो ?” समितिले सेवोनलाई पठाएको पत्रमा प्रश्न गरिएको छ । 

रिलायन्स स्पिनिङ मिल्सले बुक विल्डिङमा आइपिओ ल्याउँदा अर्थात गत आर्थिक बर्षमा आफ्नो वित्तीय विवरणमा प्रतिसेयर आम्दानी ५४ रुपैयाँ ३४ पैसा उल्लेख गरेको थियो । 
अहिले एक बर्ष नपुग्दै उक्त आम्दानी घटेर २ रुपैयाँ ०८ पैसामा सीमित भएको छ । 

त्यस्तै, समितिले सर्वसाधारण र संस्थागत लगानीकर्तालाई कम्पनीका तर्फबाट जारी गरिएको आह्वान पत्रमा वित्तीय विवरणको प्रक्षेपण आर्थिक वर्ष २०७९/८० मा प्रतिसेयर आम्दानी ५४ रुपैयाँ ३४ पैसा, आर्थिक वर्ष २०८०/८१ मा ३२ रुपैयाँ ९० पैसा, २०८१/८२ मा ३२ रुपैयाँ ८९ र २०८२÷८३ मा ५३ रुपैयाँ ९३ पैसा रहेकोमा कम्पनीबाट प्रकाशित आर्थिक वर्ष २०८०/८१ को चैतसम्मको वित्तीय विवरणमा प्रतिसेयर आम्दानी रुपैयाँ २ रुपैयाँ ०८ मात्र देखाएको हुँदा प्रक्षेपित विवरण र वास्तविकतामा सामन्जस्यता नदेखिएको पत्रमा उल्लेख गरेको छ । 

रिलायन्समा बुक बिल्डिङका लागि बिड गर्न योग्य संस्थागत लगानीकर्ताको उक्त कम्पनी वा कम्पनीका सञ्चालकहरूसँग स्वार्थ बाँझिएको छ कि छैन ? बुक बिल्डिङमा कुन संस्थागत लगानीकर्ताले कति मूल्यमा कति कित्ता शेयरका लागि आवेदन दिएका थिए, सोको समेत विस्तृत विवरणसमेत समितिले सेवोनसँग माग गरेको छ । 

कम्पनीले तीनवटा आर्थिक वर्षमा फरक-फरक प्रतिशेयर आम्दानी (हरेक आबमा घट्दै गएको) सार्वजनिक गरेको देखिएकोले सर्वसाधारण लगानीकर्ताको लगानी सुरक्षा सम्बन्धमा समितिले सेवोनको धारणा मागेको छ ।