काठमाडौँ / चालु आर्थिक बर्ष २०८०/८१ को जेठ मसान्तसम्म बीमा कम्पनीहरुले १ खर्ब ७० अर्ब बढी कुल बीमा शुल्क आर्जन गरेका छन् । 

नेपाल बीमा प्राधिरकणले सार्वजनिक गरेको तथ्याङ्क अनुसार चालु आर्थिक बर्षको जेठ महिनासम्मा हाल सञ्चालनमा रहेका १४ जिवन बीमा कम्पनी र १४ निर्जीवन बीमा कम्पनीहरूले १ खर्ब ७० अर्ब ३२ करोड ७७ लाख रुपैयाा भन्दा धेरै बीमा शुल्क आर्जन गरेका हुन् । 

प्राधिरकणले सार्वजनिक गरेको तथ्याङ्क अनुसार बीमा कम्पनीहरुको कुल बीमाशुल्क आर्जन अघिल्लो वर्षको जेठ मसान्तसम्मको तुलनामा ५.९६ प्रतिशतले बढेको देखिएको छ । अघिल्लो वर्ष सोही अवधिसम्म बीमा कम्पनीहरुले १ खर्ब ६० अर्ब ७४ करोड २६ लाख रुपैयाँ मात्रै कुल बीमाशुल्क आर्जन गरेका थिए । 

चालु आर्थिक वर्षको ११ महिनाको अवधिमा जीवन बीमा कम्पनीहरुले १ खर्ब ३३ अर्ब ७५ करोड ८६ लाख रुपैयाँ कुल बीमाशुल्क आर्जन गरेका छन् । जुन अघिल्लो वर्षको यही अवधिसम्मको तुलनामा ७.४ प्रतिशतले बढी हो । अघिल्लो वर्ष यही अवधिसम्म जीवन बीमा कम्पनीहरुले १ खर्ब २४ अर्ब ५४ करोड ३८ लाख रुपैयाँ कुल बीमाशुल्क आर्जन गरेका थिए ।

यता, चालु आर्थिक वर्षको ११ महिनामा जीवन बीमकहरुले १ करोड ४० लाख ८९ हजार ६२२ वटा बीमालेख जारी गरेका छन्। जुन अघिल्लो वर्षको यही अवधिको तुलनामा ०.१४ प्रतिशतले बढी हो । अघिल्लो वर्ष यही अवधिसम्म जीवन बीमकहरुले १ करोड ४० लाख ६९ हजार ९३७ वटा बीमालेख जारी गरेका थिए । 

यसैगरी चालु आर्थिक वर्षको ११ महिनाको अवधिमा निर्जीवन बीमा कम्पनीहरुले ३६ अर्ब ५६ करोड ९१ लाख रुपैयाँ कुल बीमाशुल्क आर्जन गरेका छन् । जुन अघिल्लो वर्षको यही अवधिसम्मको तुलनामा १.०२  प्रतिशतले बढी हो । अघिल्लो वर्ष यही अवधिसम्म जिर्जीवन बीमा कम्पनीहरुले ३६ अर्ब १९ करोड ८८ लाख रुपैयाँ कुल बीमाशुल्क आर्जन गरेका थिए ।

यता, चालु आर्थिक वर्षको ११ महिनामा निर्जीवन बीमकहरुले २७ लाख १३ हजार ७१ वटा बीमालेख जारी गरेका छन्। जुन अघिल्लो वर्षको यही अवधिको तुलनामा ६.९२ प्रतिशतले बढी हो । अघिल्लो वर्ष यही अवधिसम्म जीवन बीमकहरुले २५ लाख ३७ हजार ४१६ वटा बीमालेख जारी गरेका थिए । 

५६ प्रतिशत जनसंख्या बीमाको पहुँच बाहिर

बीमा प्रधिकरणले सार्वजनिक गरेको तथयाङ्क अनुसार चालु आर्थिक बर्षको जेठ मसान्तसम्ममा बीमा कम्पनीको व्यापार बढेपनि अझै ५६ प्रतिशत जनसंख्या बीमाको पहुँच बाहिर नै रहेको पाइएको छ । 

तथ्याङ्कअनुसार नेपालको कुल जनसंख्याको ४३.९५ प्रतिशत मानिस बीमाको दायरामा रहेका छन् । अघिल्लो वर्ष कुल जनसंख्याको ४४.२० प्रतिशत जनसंख्या बीमाको दायरामा रहेका थिए ।