काठमाडौँ / चालु आर्थिक बर्ष २०८०/८१ को ९ महिनामा मुलुकको चालु खाता र शोधनान्तर स्थित दुवै बचत रहेको देखिएको छ ।
नेपाल राष्ट्र बैंकले सार्वजनिक गरेको चालु आर्थिक वर्षको चैत मसान्तसम्मको तथ्याङ्क अनुसार समीक्षा अवधिमा चालु खाता रु.१ खर्ब ७९ अर्ब ४८ करोडले बचतमा रहेको छ।
अघिल्लो वर्षको सोही अवधिमा चालु खाता रु. ६० अर्ब ४३ करोडले घाटामा रहेको थियो। अमेरिकी डलरमा अघिल्लो वर्षको सोही अवधिमा ४६ करोड ८३ लाखले घाटामा रहेको चालु खाता समीक्षा अवधिमा १ अर्ब ३५ करोडले बचतमा रहेको छ।
समीक्षा अवधिमा पुँजीगत ट्रान्सफर १९.२ प्रतिशतले कमी आई रु.४ अर्ब ७८ करोड कायम भएको छ भने खुद प्रत्यक्ष वैदेशिक लगानी रु.६ अर्ब ४८ करोडले धनात्मक रहेको छ।
अघिल्लो वर्षको सोही अवधिमा पुँजीगत ट्रान्सफर रु.५ अर्ब ९१ करोड कायम भएको थियो भने खुद प्रत्यक्ष वैदेशिक लगानी रु.२ अर्ब ६२ करोडले धनात्मक रहेको थियो।
यो ९ महिनामा शोधनान्तर स्थिति रु.३ खर्ब ६५ अर्ब १६ करोडले बचतमा रहेको छ। अघिल्लो वर्षको सोही अवधिमा शोधनान्तर स्थिति रु.१ खर्ब ७४ अर्ब २८ करोडले बचतमा रहेको थियो।
अमेरिकी डलरमा अघिल्लो वर्षको सोही अवधिमा १ अर्ब ३२ करोडले बचतमा रहेको शोधनान्तर स्थिति समीक्षा अवधिमा २ अर्ब ७५ करोडले बचतमा रहेको छ।
.gif)
