काठमाडौँ / नेपालमा विभिन्न राजनीतिक दलका नेताहरूको जम्बो टोली कम्बोडिया प्रस्थान गरेको छ । नेकपा एमाले, नेपाली कांग्रेस, राप्रपासहितका दलका नेताहरू बुधबार राति कम्बोडिया गएका हुन् । नेताहरू कम्बोडिया गएको विषयमा नेपालमा भने चासो बढेको छ ।

सामाजिक संजालहरूमा एमाले नेता डा. राजन भट्टराईसहित केही नेता एकाएक कम्बोडियातर्फ लागेको भन्दै धेरैले चासो राखेका छन् । त्यस्तो चासोहरूमा दुर्गा प्रसाईंले उठाएको विषय पनि जोडिएको छ । तर कम्बोडियामा कार्यक्रम भने अर्कै छ ।

चासोपछि एमाले नेता भट्टराईले सामाजिक सञ्जालमार्फत कम्बोडिया यात्राबारे बताएका छन् । आफू पार्टीको स्थायी समितिको सदस्यको हैसियतले कम्बोडियामा हुने आइक्यापको १२ औँ अधिवेशनमा भाग लिन त्यसतर्फ गएको उनले लेखेका छन् । 

उनले कार्यक्रममा भाग लिन नेपालका ५ भन्दा बढी दलका १३ जना प्रतिनिधि गएकोसमेत उल्लेख गरेका छन् । उनले भने, “भ्रमको खेतीमा रमाउनेहरूलाई जानकारी होस् । कम्बोडियामा हुने आइक्यापको १२ औँ महाधिवेशनमा भाग लिन नेपालका पाँच भन्दा बढी दलका १३ जना जनप्रतिनिधि जाँदैछन् । थप केही भन्नुपर्छ ?” 

एमालेबाट पूर्वमन्त्री रघुबीर महासेठ पनि कम्बोडिया पुगेका छन् । कम्बोडियाबाट कांग्रेस नेतृ सुजाता कोइरालाले आफुसहित एमाले नेता भट्टराई र महासेठ कम्बोडिया पुगेको जानकारी दिइन् । 

उनले अन्य केही राजनीतिक दलका नेताहरू पनि कम्बोडिया आउने जानकारी भएको बताइन् । कोइरालाले सामाजिक सञ्जाल फेसबुकमार्फतसमेत कम्बोडिया यात्राबारे बताएकी छिन् ।

एसियाका राजनीतिक दलहरूको १२औँ अन्तर्राष्ट्रिय सम्मेलनमा भाग लिन आफू कम्बोडिया गएको उनले सो भिडियोमा भनेकी छन् । उनले कम्बोडियामा हुने कार्यक्रममा संस्कृति, विविधता र शान्तिको विषयमा छलफल हुने तथा सामाजिक सञ्जालका राम्रा र नराम्रा दुबै पक्षमा छलफल हुने बताएकी छन् ।
“म मेरो मातृभुमीलाई संसारसित जोडेर त्यहाँ मेरा कुरा राख्ने छु” उनले आफ्नो भिडियो सन्देशमा भनेकी छिन् ।

कार्यक्रममा सहभागी हुन राप्रपाका नेता उद्धब पौडेलसहित नेता केदारबहादुर अधिकारी कम्बोडिया गएका छन् । यसैगरी कांग्रेस नेता दिब्यमणिराज भण्डारी पनि कम्बोडिया पुगेका छन् । अन्य नेताहरू विहीबार(आज)साँझसम्म कम्बोडिया पुग्ने बताइएको छ ।

एमाले नेता भट्टराईका अनुसार माओवादी केन्द्रबाट पूर्वसभामुखसमेत रहेका नेता अग्निप्रसाद सापकोटाको नाम कम्बोडिया कार्यक्रमको विवरणमा छ । यस्तै सो दलबाट गोकर्णप्रसाद भट्ट पनि आगन्तुकको सुचीमा छन् ।

यसैगरी, नेकपा एकीकृत समाजवादीबाट डा. शंकरप्रसाद खतिवडा र वीरबहादुर तामाङको नाम छ । यस्तै, जनमत पार्टीका अध्यक्ष सीके राउत र परिवार दलका अध्यक्ष एकनाथ ढकालको नाम समेत सहभागीको सुचिमा छ । यस्तै जसपाबाट भरत गुरूङको नाम समावेस छ । उनीहरू केही आज कम्बोडिया पुग्दै छन् ।

कम्बोडियामा हुने कार्यक्रमको विहीबार साँझ उद्घाटन हुने कार्यतालिका छ । उद्घाटनपछि डीनर आयोजना गरिएको छ भने भोलि (शुक्रबार) विभिन्न चार सत्रमा मुख्य छलफल हुनेछ ।

कार्यक्रममा भोलिबाट चार वटा सत्रमा विभिन्न विषयमा छलफल हुनेछ । मिडिया फोरममा विश्वमा शान्तिका लागि भएका काम र प्रयासबारे एउटा सत्रमा छलफल हुने बताइएको छ ।

यस्तै, संस्कृति र विविधताका विषयमा अर्को छलफल हुनेछ भने नेतृत्वका सम्बन्धमा फरक छलफल हुनेछ । यस्तै फेक न्युज तथा सामाजिक सञ्जालका सकारात्मक र नकारात्मक पक्षका विषयमा अर्को छुट्टै समुहगत छलफल हुनेछ ।

कार्यक्रममा भारत र चीनबाट समेत राजनीतिक दलका नेताहरू सहभागी भएका छन् । प्राप्त सुचना अनुसार भारतबाट भारतीय जनता पार्टी (भाजपा) र कांग्रेस आईबाट कोही पनि सहभागी भएका छैनन् । अन्य दलबाट भने सहभागी छन् ।

एसियाका अन्य मुलुक तथा ल्याटिन अमेरिकाबाटसमेत विभिन्न राजनीतिक दलका नेताहरू कार्यक्रममा सहभागी हुन पुगेका छन् । कांग्रेस नेतृ कोइरालाले कार्यक्रम सकेर २४ नोभेम्बरमा स्वदेश फर्किने तालिका रहेको बताइन् ।

आफुलाई अभियन्ता बताउने दुर्गा प्रसाईंले सामाजिक सञ्जालमार्फत प्रधानमन्त्री केपी शर्मा ओली लगायतका एमाले नेताहरूले कम्बोडियामा ३२ अर्ब लगानी गरिएको भन्ने भ्रमपूर्ण हल्ला फिजाएका थिए । त्यसपछि लगत्तै नेताहरूको कम्बोडिया भ्रमण हुँदा सामाजिक सञ्जालमा चासो देखिएको थियो । प्रसाईं भने हाल अनुसन्धानका लागि प्रहरी हिरासतमा छन् । 

-नेपाल न्यूज बैंक