काठमाडौँ / नेपाल मौरीपालक महासङ्घले विदेशी महको आयात खोल्ने सरकारको तयारीप्रति खेद प्रकट गरेको छ ।
नेपाली मौरीपालक किसानहरूसँग २१०० मेट्रिक टन मह स्टक रहेकै अवस्थामा सरकारले विदेशी महको आयात खोल्ने तयारी गरिरहेको कुरा सुन्नमा आएको भन्दै महासङ्घले खेद प्रकट गरेको हो ।
एक विज्ञप्ति जारी गर्दै महासङ्घले सरकारले बहुराष्ट्रिय कम्पनीहरूको दबाबमा किसानहरूको समस्याप्रति कुनै गम्भीर चासो नदेखाइकन आयात खोल्ने तयारी गरिरहेको जनाएको छ ।
नेपालका मौरीपालक व्यवसायिक किसानहरूको ३ हजार १४३ मेट्रिक टन मह उत्पादनले बजार नपाइरहेको अवस्थामा यसअघि प्रचण्ड नेतृत्वको सरकारले विदेशी मह आयातमा रोक लगाउने निर्णय गरेको थियो ।
मौरीपालक व्यवसायिक किसानहरु विस्थापनको संघारमा पुगेको कुरालाई मध्यनजर गर्दै तत्कालीन कृषि मन्त्री, कृषि सचिव, कृषि विभाग महानिर्देशक व्यवसायिक किट विकास केन्द्रका प्रमुख र नेपाल मौरीपालक महासङ्घको पहलमा गत जेठ ८ गते संयुक्त रूपमा विस्तृत अध्ययन गरी नेपालमा बाहिरबाट आउने मह आयात स्थगन गर्ने निर्णय गरेको थियो ।
अझै पनि नेपाली मौरीपालक किसानहरूसँग २ हजार १०० मेट्रिक टन मह स्टक रहेको महासङ्घ अध्यक्ष सुभाषचन्द्र घिमिरेले बताए ।
कसैका दबामा नपरी नेपालका किसानहरूको हक र हितको लागि आयातलाई यथावत रूपमा स्थगन गरि राख्नको लागि महासङ्घले उक्त विज्ञप्तिमाफर्त अपिलसमेत गरेको छ ।
.gif)
