कोड फर चेन्जले नेपालकै ठूलो सूचना प्रविधि क्षेत्रको ह्याकाथोनको रूपमा परिचित ‘कोडफेस्ट २०२४’ को तेश्रो संस्करण आयोजना गर्ने भएको छ । 

असोज २ देखि १३ गते सम्म प्रदेशस्तरमा र राष्ट्रिय स्तरको फाइनल असोज २९ देखि कार्तिक १ गतेसम्म काठमाडौँमा उक्त कोडफेस्ट आयोजना गर्न लागिएको हो । 

‘कोडफेस्ट २०२४’मा सहभागी हुने विद्यार्थीहरूको समूहले दिगो विकासका सात वटा लक्ष्यहरूमा आधारित प्रविधिक समस्याहरूको समाधान विकास गर्ने आयोजकले जनाएको छ । 

कोडफेस्टमा गुड हेल्थ एण्ड वेल बीइङ्ग, क्वालिटी एजुकेशन, जेण्डर इक्युलिटि, ईण्डस्ट्रि इनोभेशन एण्ड इन्फ्रास्ट्रक्चर, स्मार्ट सिटीज, क्लाइमेट एक्सन, र पिस जस्टिस एण्ड स्ट्रोङ्ग इन्स्टिच्युसनका क्षेत्रका चुनौतीहरुको समाधान निकाल्न विद्यार्थीहरूलाई प्रोत्साहित गरिनेछ।

ह्याकाथोनको पहिलो चरणमा असोज २ देखि १३ गतेसम्म सातै प्रदेशमा प्रदेश स्तरीय प्रतियोगिता हुनेछ, जसबाट २१ उत्कृष्ट टोलीहरू असोज २९ देखि कार्तिक १ गतेसम्म काठमाडौँमा आयोजना हुने राष्ट्रिय फाइनलका लागि छनोट हुनेछन्। 

असोज २९,३० र कार्तिक १ गते काठमाडौँमा हुने फाइनलमा २१ टिमले प्रतिस्पर्धा गर्नेछन्। 

प्रतियोगितामा प्रथम हुने टिमले ३ लाख रुपैयाँ नगद पुरस्कार प्राप्त गर्नेछन् भने दोस्रो र तेस्रो स्थानमा आउने टिमहरूले क्रमशः २ लाख र १ लाख रुपैयाँ जित्नेछन्। 

साथै, पिपल्स च्वाइस अवार्ड अन्तर्गत ३० हजार रुपैयाँ नगद पुरस्कारका साथै विभिन्न ग्याजेट्स, स्मार्टफोन, र अन्य गिफ्ट ह्याम्पर्स पनि प्रदान गरिने आयोजकले जनाएको छ। 

कोडफेस्ट २०२४ विद्यार्थीहरूका लागि आफ्नो प्रविधिक ज्ञानलाई प्रदर्शन गर्ने र करियर सम्बन्धी ज्ञान लिने सुनौलो अवसर हुने आयोजकले विश्वास लिएको छ। 

ह्याकाथोनमा विद्यार्थीहरूबाट प्रस्तुत हुने उत्कृष्ट व्यावहारिक आईडियाहरूलाई इनक्युबेसन वा लगानीको अवसर समेत प्रदान गरिने आयोजकले जनाएको छ।