सशस्त्र प्रहरी बलले पर्सास्थित बिरगंज महानगरपालिका–१९ बर्वा लगायत बिरगंजको विभन्न ठाउँबाट मंगलबार राती विभिन्न गोदाम भित्र छापा हानेको छ । प्रहरीले छापा हान्दा ४४ लाख रुपैयाँ बढि पर्ने अवैध सामानहरु नियन्त्रणमा लिएको छ ।
प्रस्तावित सीमा सुरक्षा गुल्म बिरगंजबाट सशस्त्र प्रहरी नायव उपरीक्षक सुरज रिजालको कमाण्डमा खटिएको थियो । सुरक्षा फौजले बिरगंज भन्सार कार्यालयका कर्मचारी समेतको उपस्थितीमा अवैध रुपले राखिएको गोदाममा छापा मारेको हो ।
त्यहाँ सौन्दर्य क्रिम, मुङ दाल, मोटर पाटर््स तथा अन्य अवैध सामान बरामद गरेको छ ।
बरामद सामानमा १४ लाख ५९ हजार २ सय रुपैयाँ बराबरको लेक्मी ब्राण्डको क्रिम १४ हजार ५ सय ९२ पिस, सोही ब्राण्डको ८ लाख ६ हजार ४ सय रुपैयाँ बराबरको १६ हजार १ सय २८ पिस क्रिम रहेको छ ।
यस्तै, मानिस कोही नबस्ने सोही महानगरपालिकाको अर्को एक ठाउँबाट एक घरमा अवैध रुपले गोदाम गरी राखिएको ६ लाख रुपैयाँ बराबरको ३ हजार किलो दाल समेत बरामद भएको छ ।
यसैगरी मंगलबार राती नै सोही गुल्मले बिरगंज महानगरपालिका–१० बाट अवैध रुपमा राखिएको ११ लाख रुपैयाँ बराबरको मोटर पाटर््स र १० लाख ७५ हजार मुल्य बराबरको किराना सामान समेत बरामद गरेको प्रहरी नायव उपरीक्षक तथा सहायक प्रवक्ता शैलेन्द्र थापाले बताएका छन् ।
बरामद सामान बुधबार बिहान आवश्यक अनुसन्धान तथा कारवाहीको लागि विरगंज भन्सार कार्यालय पर्सामा बुझाईएको उनले बताए ।
यसैबिच पछिल्लो एक हप्ताको बिचमा सशस्त्र प्रहरी बल नेपालका विभिन्न युनिटले करिब ३ करोड मूल्य बराबरको अबैध सामान बरामद गरी आवश्यक कारबाहिको लागि सम्बन्धित निकायमा बुझाएको छ ।
