काभ्रेपलाञ्चोक / पनौती नगरपालिका ११ ख्याकुस्थित सावित्री थापाको घरमा २०७७ सालमा नगरपालिकाले दिएको पाडो ल्याएपछि हाल लैनो भैंसी भएको छ। 

त्यतिबेला पनि घरमा भएको भैंसी पहिलो बेत सुत्केरी हुँदा स्याहारेको अवस्थामा नगरले नै पाँच हजार ‘सुत्केरी भत्ता’ गोठमै पुगेर दिएको थियो। ‘पहिलो बेतको पाडी हुर्कियो, अहिले दोस्रो बेतमा राम्रो भएको छ, मैले बुझाएको सात हजारमध्ये पुनः पाँच हजार अनुदानमा ल्याएको पाडी सुत्केरी भत्तामा फिर्ता आयो’, थापाले भनिन्।

थापाले दुई हजार नगरलाई दिएको ‘बोट’ मा अहिले दुई लाख फलेको भन्दै थापा खुसी व्यक्त गर्छिन्। उनी भन्छिन्, ‘पहिलो बेतमा घरमा खाएर दुई लाख रुपैयाँको दूध बेचें, अब पनि त्यही हुने अपेक्षा गरेको छु।’

ख्याकुकै माधव थापाको घरमा पनि भैंसीले खुसी थपेको छ। एक वर्षदेखि उनले दैनिक पाँच लिटर दूध बेच्ने गरेका छन्। नगरले अनुदानमा दिएको पाडी ठूलो भई ब्याएर ठूलो गुन लगाएको उनको भनाइ छ। उनले सो भैंसीबाट पहिलो बेतमा एक लाख ८० हजारको दूध बिक्री गरेको सुनाए।

यस्तै नगरबाट पाडी अनुदान पाएकी स्थानीय शोभा थापाले एक वर्ष नपाल्दै ब्याएपछि घर खर्च चलाउने आधार बनेको बताइन्। ‘भैंसीले दैनिक आठ लिटर दूध दिन्छ, यसमध्ये पाँच लिटर बेच्न लैजान्छु, यसबाटै घर खर्च चलेको छ’, उनले सुनाइन्।

पनौती नगरपालिकाले तीन वर्षको अवधिमा नौ सय १९ वटा पाडी वितरण गरेको थियो। यसमध्ये हाल तीन सय ११ भैंसी ब्याइसकेको नगरको कृषि तथा पशुपक्षी शाखाको विवरणमा उल्लेख गरिएको छ।

वर्षौंदेखि गाई पाल्दै आएकी पनौती ३ को विमला सापकोटाले तीन वर्षअघि गोठमा एउटा भैंसी थपेकी थिइन्। नगरले ल्याएको अनुदानपछि भैंसी थपेर दूध बिक्रीमार्फत घर खर्चसँगै छोराछोरीको विद्यालय खर्च धान्दै आएको बताउँछिन्। ‘गाई र भैंसीको दूध बेचेर घर र छोराछोरीको खर्च धान्दै आएकी छु। यसका लागि नगरको अनुदान बिमा र सुत्केरी प्रोत्साहनले अहिले अर्को भैंसी थप्ने सोचाइमा छु’ सापकोटाले भनिन्।

वर्षौंदखि भैंसीपालन गर्दै आए पनि विभिन्न रोगको प्रकोप र दूधको उचित मूल्य नपाउँदा भैंसी पाल्न छाडेको बताउने पनौती नगरपालिका १२ का यज्ञ खत्री नगरले भैंसी पालनमा ल्याएको अनुदान, बिमा र सुत्केरी प्रोत्साहनले पुनः व्यावसायिक भैंसीपालनमा लागेका छन्। उनी भन्छन्, ‘विभिन्न समस्या र दूधको मूल्य नपाउँदा सधैं घाटामा भैंसी पाल्न नसकिने भएपछि चार भैंसी मासुको मूल्यमा बेचेर छाडेको थिएँ, अहिले पुनः भैंसी पाल्न जाँगर चलाएको छु, अहिले मेरो गोठमा सात भैंसी छन्।’

पनौती नगरको ‘भैंसी सुत्केरी भत्ता’ कार्यक्रमबाट सहयोग मिल्नुका साथै थप आत्मबल बढेको उनको भनाइ छ। ‘भैंसी पाल्दा धेरै लगानी गर्नुपर्ने, थोरै मुनाफा हुने, रोग लाग्ने डर हुन्थ्थो अब त्यो समस्या हटेको छ, भैंसीको बिमा पनि हुने अनुदान रकम पनि पाइने हामी किसानलाई ठूलो राहत मिलेको छ’, पनौती १२ कै भावना थापा भन्छिन्, ‘अब थप दुई भैंसी थपेर पाडापाडी पनि हुर्काउँछु।’ पनौती ५ का चन्द्रप्रसाद न्यौपानेले फार्म नै स्थापना गरी १७ वटा भैंसी पालेका छन्। उनी भन्छन्, ‘नगरले भत्तासँगै भ्याक्सिन र औषधि निःशुल्क गर्दा यसप्रति आकर्षण पनि थपिएको छ।’

पनौती नगरले आर्थिक वर्ष २०७४-७५ देखि नै ‘भैंसी संरक्षण–संवद्र्धन अभियान’ अन्तर्गत सुत्केरी भैंसी भत्ता कार्यक्रम सुरु गरेको थियो। जननिर्वाचित जनप्रतिनिधिले नेतृत्वमा नगरको कार्यसम्पादनको कार्यभार सम्हालेपछि सुरु गरिएको सुत्केरी भैंसी भत्ता कार्यक्रम मुलुकभर चर्चाको विषयसमेत बन्न पुग्यो।

अभियान सञ्चालनताका पनौतीमा उत्पादित दूधको परिमाणभन्दा हाल दोब्बर उत्पादन हुने गरेको नगरको तथ्यांकले देखाएको छ। त्यस आर्थिक वर्षको तथ्यांकअनुसार पनौती नगरमा चार हजार सात ४७ वटा भैंसीपालन गरिएको थियो।

त्यस समयमा वार्षिक रुपमा करिब पाँच सय वटा भैंसी खरिद भएर बाहिरी जिल्लाबाट भित्रन्थे। करिब ६ करोड रुपैयाँ भैंसी खरिदमा बाहिर रकम बाहिर जाने गरेको थियो। त्यतिबेला पनौतीमा दैनिक ४० हजार लिटर दूध उत्पादन हुने गरेको थियो। 

उत्पादितमध्ये १५ हजार लिटर यहीं खपत हुने गरेको र २५ हजार काठमाडौं उपत्यका लैजाने गरिन्थ्यो। यस अभियान सुरु गरेपछि भैंसीको संख्या पनि हाल झन्डै दोब्बर पुगेको छ।  

पहिलो बेतको भैंसी सुत्केरी हुँदा पाँच हजार र त्यसपछि दुई हजारका दरले सुत्केरी भत्ता वितरण गरिएको शाखाले जनाएको छ। उक्त कार्यक्रममा सहभागी हुन अनिवार्य बिमा गर्नुपर्ने नियम राखिएको थियो। बिमा गरेवापत लागेको प्रिमियम नगरले ५० प्रतिशत दिने व्यवस्था भयो।

भैंसीलाई खोप, घाँसका बीउ निःशुल्क उपलब्ध गराइँदै आएको जनाइएको छ। कार्यक्रम लागु गर्दाका बखत दुई सय १७ भैंसीलाई सुत्केरी भत्ता दिएको कृषि तथा पशुपंक्षी शाखा प्रमुख लीलानाथ सापकोटाले बताए। उनका अनुसार करिब एक हजार पाँच सय भैंसी–भत्ता किसानलाई वितरण गरिएको थियो। शाखाका अनुसार हाल करिब आठ हजार भैंसी पनौतीमा छन्।

हाल दूध उत्पादन दैनिक करिब ७५ हजार लिटर हाराहारीमा उत्पादन हुन्छ। यसमध्ये ५० हजार लिटर काठमाडौं बिक्रीका लागि पठाइन्छ।

काभ्रेपलाञ्चोकको १३ स्थानीय तहमध्ये पनौतीले पशुपालन क्षेत्रमा नयाँ कार्यक्रम सञ्चालन गर्दा यस नगरमा मात्रै भैंसीको संख्या दोब्बर भई दोब्बर परिमाणमा दूध उत्पादन भएको हो। जिल्लाको अधिकांश क्षेत्रका बासिन्दा पशुपालनमै छन्। पछिल्लो केही वर्षदेखि व्यावसायिक रुपमा दुग्ध उत्पादन एवं मासुका लागि पशुपालन क्षेत्रमा लागेको पाइन्छ।

काभ्रेपलान्चोक दुग्ध उत्पादन तथा प्रशोधन उद्योग नेपालमै पहिलो २००९ सालमा नै सुरु भएको जिल्ला हो। जिल्लाबाट हाल उत्पादित दैनिक चार लाख लिटर दूध स्थानीय बजारसहित काठमाडौं, भक्तपुर र ललितपुर जिल्लामा खपत भइरहेको जिल्ला दुग्ध उत्पादक संघका अध्यक्ष नारायणप्रसाद बडालले जानकारी दिए।

उनका अनुसार पछिल्ला वर्ष जिल्लामा पशुपालन व्यावसायिक हुँदै गएको र निरन्तर दूध उत्पादन बढिरहेको छ। ‘हाम्रै अध्ययनले पनि काभ्रेबाट दैनिक दुई लाख लिटरको हाराहारीमा अप्रशोधित मात्र दूध काठमाडौंं उपत्यका जाने गरेको देखाएको छ, यसलाई केही बढाउने लक्ष्य लिएका छौं’, अध्यक्ष बडालले भने।

उनका अनुसार दैनिक जिल्लाबाट दुई लाख ५० हजार लिटर दूध काठमाडौं उपत्यका निर्यात हुने गरेको छ। निर्यातित सो परिमाणको दूध उपत्यकाको बजारमा २० प्रतिशतको हाराहारीमा रहेको बडालको भनाइ छ। विवरणअनुसार उपत्यकामा दैनिक ६ लाख लिटर दूध खपत हुन्छ।

विश्व खाद्य संगठनको सन् २०१० मा प्रकाशित तथ्यांकअनुसार काभ्रेपलाञ्चोकको दुई सय ६७ दुग्ध उत्पादक सहकारी संस्थाले सो वर्ष ७२ हजार एक सय मेट्रिक टन अप्रशोधित दूध उत्पादन गरेका थिए। यो मुलुकमै सबैभन्दा बढी उत्पादन रेकर्ड हो।

काभ्रेपलाञ्चोक २०६७ सालमै दूधमा आत्मनिर्भर जिल्ला घोषणा भइसकेको हो। हाल जिल्लामा एक लाख ५५ हजार भैंसी एक लाख गाईपालन भइरहेको छ।  यहाँ उत्पादित दूध जिल्लाको अलावा काठमाडौं, भक्तपुर र ललितपुरमा खपत हुँदै आएको छ।

विसं २०७२ को विनाशकारी भूकम्पका कारण जिल्लामा झन्डै १० प्रतिशतले दूधको उत्पादनमा कमी आएको थियो। पशु, चौपायाका लागि गोठ व्यवस्थापनको अभाव, दाना तथा आहारको कमी र दुधालु पशु, चौपाया भूकम्पका कारण मरेकाले भूकम्प गएको एक वर्षसम्ममा पनि दूधको उत्पादन पहिलेकै अवस्थामा फर्कन सकेको थिएन। भूकम्पका कारण काभ्रेपलाञ्चोकमा उत्पादनशील २ हजार ५ सय पशु चौपाया मरेका थिए।

जिल्ला पशु सेवा कार्यालय काभ्रेपलाञ्चोकका अनुसार भने जिल्लामा भूकम्पअघि दैनिक चार लाख लिटर दूध उत्पादन हुने गरेको थियो। उत्पादित दूधमध्ये दुई लाख १० हजार लिटर दूध काठमाडौं निर्यात भई त्यसबाट काभ्रेपलाञ्चोकमा दैनिक एक करोड ५० लाख रकम भित्रिने गरेको थियो। कार्यालयका अनुसार उत्पादनशील पशुबाट दूधको उत्पादन बढाउन समय–समयमा पशुपालनको पकेट क्षेत्रका किसानलाई पशु भिटामिन, मिनरललगायत राहत प्याकेज वितरण गर्दै आइएको छ।

हाल दुग्ध विकास संस्थान (डिडिसी) तथा निजी डेरीले दूधको विगत दुईदेखि चार महिनाको भुक्तानी रकम रोकिँदा किसानलाई समस्या निम्तिएको छ। दूध बिक्रीबाट प्राप्त हुने भुक्तानी रकम नपाउनाले किसानलाई पशु आहारा जस्तै– घाँस, पराल, भुसा, दाना, चोकर, ब्रान्ड, खरिद गरी खुवाउन नसक्ने अवस्था सिर्जना भएको किसान संघ काभ्रेपलाञ्चोकका अध्यक्ष गोपालबहादुर तिमल्सिनाले बताए।

उनका अनुसार किसानको दूध बिक्रीको पैसा रोकिँदा बैंक तथा वित्तीय संस्थाबाट पशुपालनका लागि लिएको कर्जाको किस्ता तिर्न धौ–धौ परेको छ। यसका लागि केन्द्रीय दुग्ध सहकारी संघ तथा जिल्ला दुग्ध सहकारी संघ २०८० मङ्सिर २६ गते कृषि तथा पशुपंक्षी विकास मन्त्रालयमा भएको सहमति अनुसार कृषकलाई भुक्तानी गर्नुपर्ने बक्यौता रकम पुस मसान्तभित्रै गरिसक्ने, कृषकहरुबाट लिइरहेको दूधको परिमाण नघटाई संकलन गर्नेलगायतका कार्य हुनुपर्ने जनाउँदै आन्दोलित भएका छन्।

यस्तै ‘मिल्क होलिडे’ बन्द गरी जिल्लामा बाँकी रहेको करिब ५० करोड यथाशीघ्र भुक्तानी गर्न, आयातित दूध तथा दुधजन्य पदार्थलाई पूर्णरुपमा बन्द गर्न, दूध किसानलाई जोगाइराख्न अनुदानका कार्यक्रमहरुलाई निरन्तरता दिन, उत्पादन लागत मूल्य घटाउने कार्यक्रम सबै पालिकामा लागू गर्न, बिमा कार्यक्रमलाई प्राथमिकतामा राखी क्षतिपूर्ति भुक्तानी सहज बनाउन, दूध तथा दुग्धजन्य पदार्थ निर्यातका लागि खोरेत, लम्कीजस्ता रोगमुक्त जिल्ला घोषणा गर्न प्रत्येक स्थानीय तहमा खोप अभियान सञ्चालन, निर्यात गर्ने दुग्ध पदार्थमा अनुदानको व्यवस्था गर्न, विगतमा पाइराखेको दूध चिस्यानको विद्युत् महसुल ५० प्रतिशत कायम गर्न, लम्की रोग लागेर क्षति भएका पशुहरुको अविलम्ब क्षतिपूर्ति रकम उपलब्ध गराउन माग गर्दै आएका हुन्। 

–राजकुमार पराजुली, रासस