काठमाडौँ / चालु आर्थिक वर्ष २०८०/८१ को ५ महिनामा नेपालमा करिब १० अर्ब रुपैयाँ बराबरको सुन आयात भएको छ ।
भन्सार विभागले सार्वजनिक गरेको वैदेशिक व्यापार तथ्याङ्क अनुसार साउनदेखि मंसिरसम्ममा ९ अर्ब ९७ करोड रुपैयाँ बराबरको एक हजार २ सय एक किलो सुन आयात भएको हो ।
तथ्याङ्कअनुसार यस वर्षको सुनको वैधानिक आयात गत वर्षको यसै अवधिको तुलनामा घटेको छ । गत वर्ष ५ महिनामा नेपालले १० अर्ब ७५ करोडको एक हजार ४ सय ६६ किलो सुन आयात गरेको थियो ।
यसरी गत आर्थिक बर्षको तुलनामा चालु आ.व.मा सुन आयात ७.२५ प्रतिशतले घटेको देखिएको छ । तथ्यांकअनुसार गत आर्थिक बर्षको तुलनामा चालु आर्थिक बर्षमा सुनको आयात परिमाणमा २६५ किलो र आयात रकम करिब ७८ करोडले कम हो ।
चालु आर्थिक वर्षको मंसिरसम्म नेपालले एक हजार २ सय एक किलो सुन आयात गरेको छ ।कात्तिकसम्म नेपालमा एक हजार किलो सुन आयात भएको थियो ।
सुनको धेरै खपत हुने मंसिर महिनामा मात्रै सुन आयात परिमाण २ सय एक किलोले बढेको भन्सारले जनाएको छ । जसको लागत एक अर्ब ७६ करोड २९ लाख रुपैयाँ बराबर हुन्छ ।
चालु आवको कुन महिनामा कति सुन भित्रियो ?
साउन– २०० केजी
भदौ– ३०० केजी
असोज– ४०० केजी
कार्तिक– १०० केजी
मंसिर– २०० केजी
.gif)
