काठमाडौँ / शेयर बजारमा आइतवार देखिएको उत्साह एक दिन पनि टिकेन । आइतबार लामो समयपछि ४७ अंकले बढेको शेयर बजार सोमबार भने ११.२७ अंकले घटेको छ ।

लामो समयको अन्तरालपछि आइतबार नेप्से परिसूचक २.५६ प्रतिशतले बढेर १९०७.९५ बिन्दुमा पुगेको थियो । यसदिन २ अर्ब १ करोड १७ लाख रुपैयाँ बराबरको ६५ लाख ३० हजार कित्ता सेयर किनबेच भएको थियो । तर, उच्च अंकले नेप्से सूचक बढेको दोस्रो दिन नै पुनः दोहोरो अंकको गिरावट आएको छ । 

नेपाल स्टक एक्सचेञ्ज (नेप्से) का अनुसार आज नेप्से सूचक ११.२७ अंकले घट्दै १८ सय ९६.६७ अंकमा झरेको हो । आज दिनभरिमा २९० कम्पनीको ६० लाख १७ हजार ३९७ कित्ता शेयर किनबेच हुँदा १ अर्ब ७५ करोड ४७ लाख रुपैयाँको शेयर कारोबार भएको छ । 

आज होटल्स एण्ड टुरिजम, इन्भेष्टमेन्ट, म्युचुअल फण्ड, निर्जीवन बीमा र ट्रेडिङ उपसूचक बाहेक बाँकी ९ वटा उपसूचक ऋणात्मक भएका छन् । आज सबैभन्दा धेरै सोनापुर मिनरल्सको शेयर कारोबार भएको छ । आज यस कम्पनीको ७ करोड ७७ लाख रुपैयाँको शेयर कारोबार भएको छ ।

त्यस्तै, रिलायबल नेपाल लाइफको ७ करोड ६० लाख रुपैयाँको शेयर कारोबार भएको छ । सिटिजन लाइफको ६ करोड ४८ लाख रुपैयाँको शेयर कारोबार भएको छ । प्रभु बैंकको ५ करोड २६ लाख रुपैयाँ संस्थापक शेयर कारोबार भएको छ ।

आज सबैभनदा धेरै अपर साङगे हाइड्रोपावर कम्पनीका लगानीकर्ताले कमाएका छन् । आज यस कम्पनीका लगानीकर्ताले १० प्रतिशतका दरले कमाएका हुन् । अभियान लघुवित्तका लगानीकर्ताले ७ दशलमव ७२ प्रतिशतका दरले कमाएका छन् । माथिल्लो मैलुङ खोलाका लगानीकर्ताले ७ दशलमव ४९ प्रतिशतका दरले कमाएका छन् ।

आज सबैभन्दा धेरै स्वाभिमान लघुवित्त वित्तीय संस्थाका लगानीकर्ताले गुमाएका छन् । आज यस कम्पनीका लगानीकर्ताले ८ प्रतिशतका दरले गुमाएका हुन् ।